YUNESKO Ukraynadan təxliyə olunan tələbələrin təhsili üçün imkanları təhlil edəcək
YUNESKO-nun baş direktorunun təhsil üzrə köməkçisi xanım Stefaniya Giannini ilə Ukrayna Elm və Təhsil Nazirliyi arasında onlayn görüş keçirilib.
Görüşdə YUNESKO, Ukrayna üçün son dərəcə çətin olan bu dövrdə ukraynalı şagirdlərin, tələbələrin, müəllimlərin, mühazirəçilərin təhsil və elmi prosesinə çıxışında dəstək olmağa çağırılıb.
AzEdu.azxəbər verir ki, bu barədə Ukraynanın Elm və Təhsil naziri Sergey Şkarlet məlumat verib.
Həmçinin xanım Stefaniya Ukrayna xalqına tam dəstəyini ifadə edərək YUNESKO-nun Ukraynanın distant təhsil sistemini genişləndirmək və gücləndirmək üçün ekspert yardımı göstərməyə hazır olduğunu bildirib.
Eyni zamanda, direktor köməkçisi qeyd edib ki, YUNESKO öz mandatı çərçivəsində Ukraynanın müvəqqəti təxliyə edilmiş vətəndaşları üçün Avropa İttifaqı ölkələri tərəfindən, xüsusən də ali təhsil üçün hansı təhsil imkanlarının təmin oluna biləcəyini təhlil edəcək. O, bəzi ölkələrin universitetlərinin artıq tələbələri və alimləri fəal şəkildə dəstəklədiyini, onların öyrənmə və fəaliyyətlərində kömək etməyə hazır olduqlarını diqqətə çatdırıb.
Nazirlik həmçinin xanım Stefanidən mədəniyyət abidələrinin, o cümlədən təhsil müəssisələrinin amansızlıqla dağıdılması nəticəsində yaranmış vəziyyətin təhlilinə xüsusi diqqət yetirməyi xahiş edib.
