Müəllimlərin işə qəbulu imtahanının nəticələri nə vaxt bilinəcək?
2017-ci ildə müəllimlərin işə qəbulu ilə bağlı test imtahanı mərhələsində müvafiq keçid balı toplayan, lakin vakant yerə qəbul ola bilməyən müəllimlərin işə qəbulu üçün keçirilən müsahibələrin nəticələri gələn həftənin əvvəlində açıqlanacaq.
Milli.AzTrend-ə istinadən xəbər verir ki, bunu Təhsil Nazirliyinin İnsan resursları şöbəsinin müdir müavini Eşqi Bağırov deyib.
Onun sözlərinə görə, 2017-ci ildə müəllimlərin işə qəbulu ilə bağlı test imtahanı mərhələsində müvafiq keçid balı toplayan, lakin vakant yerə qəbul ola bilməyən müəllimlər bu tədris ili ərzində yeni yaranan vakant yerlərə, yaxud müsabiqədə tutulmayan vakant yerlərə müddətli əmək müqaviləsi ilə işə cəlb olunurlar.
Ölkə üzrə belə müəllimlərin sayının 2 mindən çox olduğunu deyən nazirlik rəsmisi deyib ki, belə müəllimlərin işə qəbulu prosesinin mərkəzləşmiş qaydada həyata keçirilməsi məqsədilə onların proqram təminatı vasitəsilə elektron qeydiyyatın aparılması və müraciət edən müəllimlərin daimi əsaslarla işə qəbulu məsələsinə baxılması qərara alınıb .
E.Bağırov bildirib ki, martın 29-dan aprelin 4-dək elektron qaydada qeydiyyat həyata keçirilib, 2800-ə yaxın müəllim qeydiyyatdan keçib: "Təhsil Nazirliyi və Təhsil İşçilərinin Peşəkar İnkişafı İnstitutunun nəzdində yeni yaradılan İnsan Resursları Mərkəzi tərəfindən həmin müəllimlərin məlumatları emal olunub, nəticədə 800-ə yaxın müəllim müsahibə mərhələsinə dəvət olunub. Hazırda müsahibələr davam edir. Bu gün 460 nəfərə yaxın namizəd dəvət edilib. Onlar ibtidai sinif, fiziki tərbiyə, musiqi müəllimləridir. Sabah isə qalan digər bütün fənlərin müəllimləri müsahibələrdə iştirak edəcəklər".
E.Bağırov deyib ki, müsahibənin keçirilməsi üçün 20 komissiya fəaliyyət göstərir.
Müsahibələrin sabah yekunlaşacağını deyən E.Bağırov əlavə edib ki, növbəti həftənin əvvəlində Təhsil Nazirliyi tərəfindən hər bir namizədin şəxsi səhifəsinə müsahibələrin nəticələri göndəriləcək: "Müsabiqəyə dəvət olunmayan namizədlərin də elektron ünvanlarına imtinanın səbəbi göndəriləcək".
Milli.Az
