İnstitutun baş direktoru Azərbaycan dilinə əcnəbi söz gətirənləri tənqid edib
"Hər kəs öz səviyyəsinə uyğun, gözləmədiyin halda lazım olmayan sözləri dilimizə gətirir".
Bunu"Report"a açıqlamasında Nəsimi adına Dilçilik İnstitutun baş direktoru, filologiya elmləri doktoru, professor Nadir Məmmədli deyib.
O bildirib ki, mütəmadi olaraq dilimizə əcnəbi və yad sözlər keçir: "Biz bunun əleyhinə deyilik. Dilimizə yeni sözlərin keçməsi inteqrasiyadır və bu, bizim dünya mədəniyyəti ilə əlaqəmizin nəticəsidir. Bunsuz keçinmək mümkün deyil. Amma qorxulu tərəfi odur ki, dilimizdə ifadə edəcəyimiz söz mövcud olduğu halda onun qarşılığını əcnəbi dildən gətiririk. Bununla mübarizə xüsusilə publisistikanın və mətbuatın üzərinə düşür. Çalışmalıyıq ki, dilimizdə olan sözləri tapaq”.
Professor əlavə edib ki, dialektlər Azərbaycan ədəbi dili üçün hər zaman baza rolunu oynayır: “Əgər sözün qarşılığı dialektimizdə yoxdursa, başqa türkdilli xalqlardan götürmək olar. Orada da yoxdursa, əcnəbi sözlərdən götürmək olar. Bəzi insanlar deyir ki, dilimizdə alınma sözlər işlənməsin. Biz onun əleyhinəyik. Alınma sözlə əcnəbi söz ayrı məsələlərdir. Bu gün alınma sözlər dilə ehtiyacdan gələnlərdir. Məsələn, kompüter sözünü nə ilə əvəz edə bilərdik. Bütün dünyanın işlətdiyini biz də işlədirik”.
