Energetika naziri ikinci “Yüksəliş” müsabiqəsinin qalibləri ilə görüş keçirib
Energetika naziri Pərviz Şahbazov ikinci “Yüksəliş” müsabiqəsinin mentorluq proqramı çərçivəsində müsabiqə qalibi Nihad Mənsimzadə ilə onlayn, Şöhrət İsa-zadə ilə üz-üzə görüş keçirib.
AZƏRTACxəbər verir ki, görüşdə Nihad Mənsimzadə və Şöhrət İsa-zadəni ikinci “Yüksəliş” müsabiqəsində qaliblər sırasında yer alması münasibətilə təbrik edən Pərviz Şahbazov onların praktiki fəaliyyətə cəlb olunmaqla idarəçilik sahəsində təcrübələrinin artırılması üçün zəruri dəstək göstəriləcəyini bildirib. Layihənin idarəçi rəhbərlərindən biri olaraq energetika naziri 1 illik fərdi inkişaf planı əsasında müsabiqə qalibləri ilə sıx əməkdaşlıq edəcəyini, onlarla təcrübəsini bölüşəcəyini və beləliklə, potensiallarını üzə çıxarmağa kömək göstərəcəyini qeyd edib.
Pərviz Şahbazov vurğulayıb ki, qaliblərin mentorluq proqramını yüksək səviyyədə həyata keçirməsi üçün Energetika Nazirliyi tərəfindən lazımi şərait yaradılacaq.
İkinci “Yüksəliş” müsabiqəsinin qalibləri isə mentorluq proqramı çərçivəsində Pərviz Şahbazova yaradılan imkana və səmimi qəbula görə təşəkkür edərək onun şəxsi təcrübəsindən faydalanmaq istədiklərini bildiriblər.
Xatırladaq ki, “Yüksəliş” müsabiqəsi Azərbaycan Respublikası Prezidentinin 26 iyul 2019-cu il tarixində imzaladığı Sərəncamla təsis olunub. Müsabiqə 21-51 yaş aralığında, ikiillik idarəçilik təcrübəsi olan, ali təhsilli Azərbaycan Respublikasının vətəndaşlarını əhatə edir. Müsabiqə 5 mərhələdən – qeydiyyat, onlayn seçim, əyani, yarımfinal və finaldan ibarətdir. Müsabiqə qalibləriidarəçi rəhbərlərtərəfindən 1 illik fərdi inkişaf planı və hər biri 20 min manat məbləğində özünüinkişaf qrantı əldə edirlər.
Qeyd edək ki, sayca 3-cü “Yüksəliş” müsabiqəsinin keçirilməsi ilə bağlı Azərbaycan Respublikasının Prezidenti tərəfindən 20 dekabr 2022-ci il tarixində Sərəncam imzalanıb.
