ADU və USAID arasında əməkdaşlıq imkanları müzakirə olunub
ABŞ-nin Beynəlxalq İnkişaf Agentliyinin (USAID) Azərbaycan üzrə missiyasının direktoru Maykl Nirbas Azərbaycan Dillər Universitetində (ADU) olub.
Bu barədəAZƏRTAC-a ADU-dan bildirilib. Universitetin rektoru akademik Kamal Abdulla qonağa ADU-nun beynəlxalq əlaqələrindən danışıb. Rektor bildirib ki, Bakı Amerika Mərkəzi uzun illərdir Azərbaycan Dillər Universitetində uğurla fəaliyyət göstərir, mərkəzin həyata keçirdiyi layihələr təkcə tələbə və müəllimləri deyil, eyni zamanda, ictimaiyyətin bu istiqamətə maraqlı olan nümayəndələrini əhatə edir.
Akademik Kamal Abdulla missiya direktoru Maykl Nirbası universitetdə fəaliyyət göstərən “Səfir klubu” çərçivəsində tələbələrlə görüşə dəvət edib.
ADU-da olmaqdan məmnun olduğunu deyən USAID direktoru təhsil ocaqları ilə əməkdaşlığın geniş perspektivlərindən danışıb. ADU-ya bu istiqamətdə böyük önəm verdiyini diqqətə çatdıran qonaq tələbə və müəllimlərin bu əməkdaşlıqdan böyük fayda götürəcəyinə əminliyini bildirib.
Görüşdə universitetin beynəlxalq jurnalistika ixtisası üzrə təhsil alan tələbələri üçün media savadlılığı, multimedia, praktik və nəzəri jurnalistika, beynəlxalq təcrübə və s. istiqamətlərdə əməkdaşlıq üçün fikir mübadiləsi aparılıb.
